ലക്ഷദ്വീപ് നിവാസികൾക്കായി എറണാകുളത്ത് ഖബർസ്ഥാൻ പദ്ധതി; അമിനി ഒട്ടോ ഡ്രൈവേഴ്‌സ് അസോസിയേഷന്റെ സഹായം

എറണാകുളം: ലക്ഷദ്വീപ് നിവാസികൾക്കായി എറണാകുളത്ത് ഒരുക്കുന്ന ഖബർസ്ഥാൻ പദ്ധതിയുടെ ഭാഗമായി അമിനി ഒട്ടോ ഡ്രൈവേഴ്‌സ് അസോസിയേഷൻ സാമ്പത്തിക സഹായം കൈമാറി. അമിനിയിൽ നടന്ന ചടങ്ങിൽ അസോസിയേഷൻ പ്രതിനിധികൾ പദ്ധതിക്കായുള്ള തുക കൈമാറി.

ലക്ഷദ്വീപിൽ നിന്നുള്ളവർക്ക് എറണാകുളത്ത് ചികിത്സയ്ക്കും മറ്റ് ആവശ്യങ്ങൾക്കുമായി എത്തുമ്പോൾ മരണപ്പെടുന്ന സാഹചര്യത്തിൽ മൃതദേഹങ്ങൾ മറവുചെയ്യുന്നതിനുള്ള സൗകര്യം ഒരുക്കുക എന്ന ലക്ഷ്യത്തോടെയാണ് ഖബർസ്ഥാൻ പദ്ധതി നടപ്പാക്കുന്നത്. ദ്വീപ് നിവാസികളുടെ ദീർഘകാല ആവശ്യമായ ഈ പദ്ധതിക്ക് വിവിധ വ്യക്തികളും സംഘടനകളും പിന്തുണയുമായി മുന്നോട്ടുവരുന്നുണ്ട്.

സാമൂഹിക ഐക്യത്തിന്റെയും സ്നേഹത്തിന്റെയും സഹജീവിതബോധത്തിന്റെയും ഭാഗമായി അമിനി ഒട്ടോ ഡ്രൈവേഴ്‌സ് അസോസിയേഷൻ നൽകിയ സഹായം പദ്ധതിക്ക് പിന്തുണയേകുന്നതാണ്. ദ്വീപ് നിവാസികൾക്ക് ആശ്വാസമാകുന്ന ഈ ഉദ്യമത്തിന് കൂടുതൽ പേരുടെ സഹകരണവും പിന്തുണയും ലഭിക്കുമെന്ന പ്രതീക്ഷയിലാണ് സംഘാടകർ.