കടമത്ത് പുതിയ ബിരുദ കോഴ്‌സുകൾ: ക്ലാസുകൾ ഉടൻ ആരംഭിക്കണം; പോണ്ടിച്ചേരി സർവകലാശാല ഇടപെടണമെന്ന് യൂത്ത് കോൺഗ്രസ്

കടമത്ത്: ഗവൺമെന്റ് കോളേജ് ഓഫ് ആർട്സ് ആൻഡ് സയൻസിൽ പുതുതായി ആരംഭിച്ച ബി.എസ്‌സി കമ്പ്യൂട്ടർ സയൻസ് (ഓണേഴ്‌സ്), ബി.ബി.എ (ടൂറിസം) കോഴ്‌സുകളിലെ ക്ലാസുകൾ ഉടൻ ആരംഭിക്കണമെന്ന് ആവശ്യപ്പെട്ട് ഇന്ത്യൻ യൂത്ത് കോൺഗ്രസ് കടമത്ത് ഐലൻഡ് കമ്മിറ്റി പോണ്ടിച്ചേരി സർവകലാശാല ഡീനിനും രജിസ്ട്രാറിനും നിവേദനം നൽകി.

2026–27 അധ്യയന വർഷത്തേക്കുള്ള കൗൺസലിംഗും താൽക്കാലിക സീറ്റ് അലോട്ട്മെന്റും ലക്ഷദ്വീപ് വിദ്യാഭ്യാസ വകുപ്പ് പൂർത്തിയാക്കിയിട്ടും സർവകലാശാല അഫിലിയേഷൻ, അന്തിമ പ്രവേശന നടപടികൾ, ക്ലാസുകളുടെ ആരംഭം എന്നിവ സംബന്ധിച്ച് വിദ്യാർത്ഥികൾക്ക് ഇപ്പോഴും വ്യക്തത ലഭിച്ചിട്ടില്ലെന്നാണ് നിവേദനത്തിലെ പ്രധാന ആരോപണം.

നിലവിലെ അനിശ്ചിതത്വം വിദ്യാർത്ഥികളിലും രക്ഷിതാക്കളിലും ആശങ്ക സൃഷ്ടിച്ചിട്ടുണ്ടെന്നും, പല വിദ്യാർത്ഥികൾക്കും മറ്റ് സ്ഥാപനങ്ങളിൽ പ്രവേശനം നേടാനുള്ള അവസരം നഷ്ടപ്പെടുന്ന സാഹചര്യമുണ്ടെന്നും യൂത്ത് കോൺഗ്രസ് ചൂണ്ടിക്കാട്ടി.

അധ്യയന കലണ്ടർ വൈകുന്നതിന് കൂടുതൽ ഗുരുതര പ്രത്യാഘാതങ്ങൾ ഉണ്ടാക്കുമെന്ന് നിവേദനത്തിൽ പറയുന്നു. പോണ്ടിച്ചേരി സർവകലാശാലയുടെ ലക്ഷദ്വീപിലെ അഫിലിയേറ്റഡ് കോളേജുകൾക്കുള്ള ഒന്നാം വർഷ അധ്യയന സെഷൻ 2026 ജൂൺ ഒന്നിന് ആരംഭിച്ചിരിക്കെ, ഒന്നാം സെമസ്റ്റർ പരീക്ഷകൾ ഡിസംബർ 10 മുതൽ ആരംഭിക്കാനാണ് നിശ്ചയിച്ചിരിക്കുന്നത്. അഫിലിയേഷൻ നടപടികളിലെ കാലതാമസം ഹാജർ, ഇന്റേണൽ അസസ്മെന്റ്, സിലബസ് പൂർത്തീകരണം, പരീക്ഷാ യോഗ്യത തുടങ്ങിയ കാര്യങ്ങളെ ബാധിക്കാനിടയുണ്ടെന്നും നിവേദനത്തിൽ പറയുന്നു.


പുതിയ കോഴ്‌സുകളുടെ ശേഷിക്കുന്ന അഫിലിയേഷൻ നടപടികൾ അടിയന്തരമായി പൂർത്തിയാക്കുക, കൗൺസലിംഗ് വഴി തിരഞ്ഞെടുക്കപ്പെട്ട വിദ്യാർത്ഥികൾക്ക് അംഗീകൃതവും തടസ്സമില്ലാത്തതുമായ പഠനം ഉറപ്പാക്കുക, പ്രവേശനവും ക്ലാസുകളും ഉടൻ ആരംഭിക്കുകയോ ക്രമീകരിക്കുകയോ ചെയ്യുക എന്നിവയാണ് പ്രധാന ആവശ്യങ്ങൾ.

കൂടാതെ അഫിലിയേഷൻ, പ്രവേശനം, ക്ലാസ് ആരംഭം, പരീക്ഷാ യോഗ്യത എന്നിവ സംബന്ധിച്ച് കോളേജിനും വിദ്യാർത്ഥികൾക്കും രക്ഷിതാക്കൾക്കും രേഖാമൂലം വ്യക്തത നൽകണമെന്നും ആവശ്യപ്പെട്ടു. പോണ്ടിച്ചേരി സർവകലാശാല, ലക്ഷദ്വീപ് ഭരണകൂടം, ഗവൺമെന്റ് കോളേജ് ഓഫ് ആർട്സ് ആൻഡ് സയൻസ്, കടമത്ത് എന്നിവ തമ്മിൽ സമയബന്ധിതമായ ഏകോപന സംവിധാനം ഏർപ്പെടുത്തണമെന്നും യൂത്ത് കോൺഗ്രസ് ആവശ്യപ്പെട്ടു.

ഇന്ത്യൻ യൂത്ത് കോൺഗ്രസ് കടമത്ത് ഐലൻഡ് കമ്മിറ്റി ജനറൽ സെക്രട്ടറി മുഹമ്മദ് ഷഫീഹുൽ ആലം കെ.എം. ആണ് ഡീനിനും രജിസ്ട്രാറിനും നിവേദനം സമർപ്പിച്ചത്.