എ.എഫ്.ഐ.വാർഷിക പൊതുയോഗത്തിൽ ലക്ഷദ്വീപ് പ്രതിനിധിയും.

കവരത്തി: ലക്ഷദ്വീപ് അത്‌ലറ്റിക്സ് അസോസിയേഷൻ (LAA) ജനറൽ സെക്രട്ടറി മുസ്നദ് നാഗാലാൻഡിലെ കോഹിമയിൽ നടന്ന അത്‌ലറ്റിക്സ് ഫെഡറേഷൻ ഓഫ് ഇന്ത്യ (AFI)യുടെ വാർഷിക പൊതുയോഗത്തിൽ (AGM) പങ്കെടുത്തു. രാജ്യത്തെ വിവിധ സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും പ്രതിനിധികൾ പങ്കെടുത്ത യോഗത്തിൽ, അസോസിയേഷന്റെ കഴിഞ്ഞ വർഷത്തെ പ്രവർത്തന റിപ്പോർട്ട് അദ്ദേഹം അവതരിപ്പിച്ചു.

ലക്ഷദ്വീപിൽ അത്‌ലറ്റിക്സ് രംഗത്ത് കഴിഞ്ഞ വർഷം നടപ്പാക്കിയ പരിശീലന ക്യാമ്പുകൾ, മത്സരങ്ങൾ, യുവതാരങ്ങളെ കണ്ടെത്തുന്നതിനായുള്ള പദ്ധതികൾ തുടങ്ങിയവ റിപ്പോർട്ടിൽ ഉൾപ്പെടുത്തി. ദ്വീപുകളിലെ കായിക അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും കൂടുതൽ അവസരങ്ങൾ സൃഷ്ടിക്കുന്നതിനുമായി കേന്ദ്ര ഫെഡറേഷന്റെ പിന്തുണ ആവശ്യപ്പെട്ടതായും അദ്ദേഹം അറിയിച്ചു.

യോഗത്തിൽ രാജ്യത്തെ അത്‌ലറ്റിക്സ് വികസനവുമായി ബന്ധപ്പെട്ട വിവിധ വിഷയങ്ങൾ ചർച്ച ചെയ്തു. ലക്ഷദ്വീപിലെ കായികരംഗത്തെ മുന്നേറ്റത്തിന് ഇത്തരം ദേശീയതലത്തിലുള്ള യോഗങ്ങളിൽ പങ്കാളിത്തം ഗുണകരമാകുമെന്ന് കായികപ്രേമികൾ അഭിപ്രായപ്പെട്ടു.