ടോക്കിയോ: ജപ്പാനില്‍ ഒരു ട്യൂണ മീൻ (ചൂര) ലേലത്തില്‍ പോയത് 11 കോടി രൂപയ്ക്ക് (1.3 മില്യണ്‍ ഡോളർ). പുതുവത്സരത്തോടനുബന്ധിച്ച്‌ നടത്തിയ ലേലത്തിലാണ് 276 കിലോഗ്രാം ഭാരം വരുന്ന ബ്ലൂ ഫിൻ ട്യൂണയ്ക്ക് 11 കോടി രൂപ ലഭിച്ചത്.
ജപ്പാനിലെ ടോക്കിയോയിലെ മത്സ്യ മാർക്കറ്റിലാണ് അസാധാരണ വിലയ്ക്ക് ട്യൂണമീൻ വില്‍പന നടന്നത്.
പുതുവത്സരത്തോടനുബന്ധിച്ച്‌ ടോക്കിയോയിലെ മത്സ്യ മാർക്കറ്റില്‍ നടന്ന ലേലത്തില്‍ ഒരു ട്യൂണ മീനിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. ഒണോഡേര എന്ന ഹോട്ടല്‍ ഗ്രൂപ്പാണ് 11 കോടി രൂപയ്ക്ക് ട്യൂണ മീനിനെ സ്വന്തമാക്കിയത്.
കഴിഞ്ഞ അഞ്ചുവർഷത്തോളമായി ട്യൂണ മീനുകളെ വൻതുക നല്‍കിയാണ് ഒണോഡേര ഗ്രൂപ്പ് ലേലത്തില്‍ സ്വന്തമാക്കുന്നത്. 114 മില്യണ്‍ യെന്നിനാണ് (6.2 കോടി രൂപ) ഒരു ട്യൂണ മീനിനെ കഴിഞ്ഞവർഷം ഒണോഡേര ഗ്രൂപ്പ് സ്വന്തമാക്കിയത്.
ടോക്കിയോ മത്സ്യ മാർക്കറ്റിലെ ലേലത്തില്‍ ട്യൂണയ്ക്ക് ഏറ്റവും വലിയ തുക ലഭിക്കുന്നത് 2019-ലാണ്. അന്ന് 278 കിലോഗ്രാം ഭാരം വരുന്ന ഒരു ബ്ലൂഫിൻ ട്യൂണയ്ക്ക് ലഭിച്ചത് 333.6 മില്യണ്‍ യെൻ (18.19 കോടി രൂപ) ആണ്. സുഷി ഷണ്‍മയ് നാഷണല്‍ റെസ്റ്റോറന്റ് നടത്തിപ്പുകാരനായ കിയോഷി കിമുരയാണ് അന്ന് ലേലത്തില്‍ ചൂര മീനിനെ സ്വന്തമാക്കിയത്.
