ഹജ് തീർഥാടകർക്ക് ഇനി മൂന്ന് നേരം ഭക്ഷണം; പ്രത്യേക ക്രമീകരണവുമായി സൗദി ഹജ് മന്ത്രാലയം

കരിപ്പൂർ: ഹജ് തീർഥാടകർക്ക് സൗദി അറേബ്യയിൽ ഇത്തവണ മൂന്ന് നേരം ഭക്ഷണം ഉറപ്പാക്കുന്നതിനുള്ള പ്രത്യേക ക്രമീകരണങ്ങളുമായി സൗദി ഹജ് മന്ത്രാലയം. വിവിധ രാജ്യങ്ങളിൽ നിന്നെത്തുന്ന തീർഥാടകരുടെ ഭക്ഷണരീതികളും ആവശ്യങ്ങളും പരിഗണിച്ച് ദിവസവും മൂന്ന് നേരം അനുയോജ്യമായ ഭക്ഷണം ലഭ്യമാക്കാനാണ് തീരുമാനം.

കേറ്ററിങ് സംവിധാനത്തിലൂടെയായിരിക്കും ഭക്ഷണ വിതരണം നടത്തുക. ഇതിനായി പ്രത്യേക സംഘങ്ങളെ നിയോഗിക്കും. ഹജ് തീർഥാടനത്തിനിടെ ഭക്ഷണം കണ്ടെത്തുന്നതിനും കൃത്യസമയത്ത് ഭക്ഷണം ലഭിക്കുന്നതിനും തീർഥാടകർ നേരിടുന്ന ബുദ്ധിമുട്ടുകൾ പരിഗണിച്ചാണ് പുതിയ നടപടി.

സൗദി ഹജ് മന്ത്രാലയത്തിന്റെ നേരിട്ടുള്ള മേൽനോട്ടത്തിൽ ഇത്തരമൊരു വിപുലമായ ഭക്ഷണ വിതരണ സംവിധാനം ആദ്യമായാണ് നടപ്പാക്കുന്നത്. നേരത്തെ തീർഥാടകർ താമസിക്കുന്ന കെട്ടിടങ്ങളിൽ ഭക്ഷണം പാകം ചെയ്യുന്നതിനുള്ള സൗകര്യങ്ങൾ ഒരുക്കിയിരുന്നെങ്കിലും എല്ലാ കെട്ടിടങ്ങളിലും ഈ സംവിധാനം ലഭ്യമായിരുന്നില്ല. ഇതുമൂലം നിരവധി തീർഥാടകർ സന്നദ്ധ സംഘടനകൾ വിതരണം ചെയ്യുന്ന ഭക്ഷണത്തെയാണ് ആശ്രയിച്ചിരുന്നത്.

ചില കേന്ദ്രങ്ങളിൽ കേറ്ററിങ് സംവിധാനം പരീക്ഷിച്ചിരുന്നെങ്കിലും എല്ലാ സ്ഥലങ്ങളിലും ഫലപ്രദമായി നടപ്പാക്കാൻ സാധിച്ചിരുന്നില്ല. ഇതോടെ പല തീർഥാടകർക്കും സമയബന്ധിതമായി ഭക്ഷണം ലഭിക്കാത്ത സാഹചര്യമുണ്ടായിരുന്നു.

കേരളത്തിൽ നിന്നുള്ള തീർഥാടകർക്ക് മലയാളി സന്നദ്ധ സംഘടനകളുടെ നേതൃത്വത്തിൽ കഞ്ഞി ഉൾപ്പെടെയുള്ള നാടൻ ഭക്ഷണങ്ങൾ വിതരണം ചെയ്യുന്നത് പതിവാണ്. ഇത്തരം ഭക്ഷണ വിതരണ സംവിധാനങ്ങൾ നിരവധി തീർഥാടകർക്ക് വലിയ ആശ്വാസമായിരുന്നു.

പുതിയ ക്രമീകരണത്തിലൂടെ തീർഥാടകർക്ക് അവരുടെ ഭക്ഷണശീലങ്ങൾക്ക് അനുയോജ്യമായ ഭക്ഷണം ലഭ്യമാക്കാനാണ് ലക്ഷ്യമിടുന്നത്. തീർഥാടനത്തിന്റെ ഭാഗമായി സഞ്ചരിക്കുന്ന വിവിധ കേന്ദ്രങ്ങളിലും ഭക്ഷണ വിതരണം ഉറപ്പാക്കുന്നതിനുള്ള നടപടികൾ സ്വീകരിക്കുമെന്ന് അധികൃതർ അറിയിച്ചിട്ടുണ്ട്.

ഭക്ഷണത്തിനായി തീർഥാടകർ നേരിടുന്ന പ്രയാസങ്ങൾ ഒഴിവാക്കാനും ഹജ് കർമങ്ങൾ കൂടുതൽ സൗകര്യപ്രദമായി നിർവഹിക്കാൻ സാഹചര്യമൊരുക്കാനും പുതിയ സംവിധാനം സഹായിക്കുമെന്നാണ് പ്രതീക്ഷ.