ലക്ഷദ്വീപിലെ സർക്കാർ കോളേജുകളിൽ ഗസ്റ്റ് അധ്യാപക നിയമനം; അപേക്ഷിക്കാനുള്ള അവസാന തീയതി നവംബർ 15

കവരത്തി: ലക്ഷദ്വീപ് വിദ്യാഭ്യാസ വകുപ്പിന് കീഴിലുള്ള സർക്കാർ കോളേജുകളിലും ഉന്നത വിദ്യാഭ്യാസ സ്ഥാപനങ്ങളിലും ഗസ്റ്റ് അടിസ്ഥാനത്തിൽ അധ്യാപകരെ നിയമിക്കുന്നതിനായി യോഗ്യരായ ഉദ്യോഗാർഥികളുടെ പാനൽ തയ്യാറാക്കുന്നു. ഇതുസംബന്ധിച്ച് വിദ്യാഭ്യാസ ഡയറക്ടറേറ്റ് ഒക്ടോബർ 30-ന് തൊഴിൽ വിജ്ഞാപനം പുറത്തിറക്കി.

അസിസ്റ്റന്റ് പ്രൊഫസർ, ലക്ചറർ തുടങ്ങിയ തസ്തികകളിലാണ് നിയമനം. ഇംഗ്ലീഷ്, സാമ്പത്തികശാസ്ത്രം, പൊളിറ്റിക്കൽ സയൻസ്, കൊമേഴ്‌സ്, അക്വാ കൾച്ചർ, ബി.ബി.എ ടൂറിസം, കമ്പ്യൂട്ടർ സയൻസ്, മലയാളം, ഹിന്ദി, ഇംഗ്ലീഷ് എജ്യുക്കേഷൻ, ഫിസിക്കൽ സയൻസ് എജ്യുക്കേഷൻ, നാച്ചുറൽ സയൻസ് എജ്യുക്കേഷൻ തുടങ്ങിയ വിഷയങ്ങളിൽ അസിസ്റ്റന്റ് പ്രൊഫസർ തസ്തികകളിലേക്കും കമ്പ്യൂട്ടർ സയൻസ് എൻജിനീയറിങ്, ഇംഗ്ലീഷ്, കെമിസ്ട്രി, ഫിസിക്സ് വിഷയങ്ങളിൽ ലക്ചറർ തസ്തികകളിലേക്കുമാണ് പാനൽ തയ്യാറാക്കുന്നത്.

അസിസ്റ്റന്റ് പ്രൊഫസർ തസ്തികകളിൽ ബന്ധപ്പെട്ട വിഷയത്തിൽ കുറഞ്ഞത് 55 ശതമാനം മാർക്കോടെയുള്ള ബിരുദാനന്തര ബിരുദവും യു.ജി.സി നെറ്റ്/ജെ.ആർ.എഫ് യോഗ്യതയും അടിസ്ഥാന യോഗ്യതയായി നിശ്ചയിച്ചിട്ടുണ്ട്. ചില തസ്തികകൾക്ക് പ്രത്യേക വിഷയപരമായ യോഗ്യതകളും ആവശ്യമാണ്. ലക്ചറർ തസ്തികകളിൽ ബന്ധപ്പെട്ട വിഷയത്തിൽ ഫസ്റ്റ് ക്ലാസോടെയുള്ള ബിരുദം അല്ലെങ്കിൽ വിജ്ഞാപനത്തിൽ നിർദേശിച്ചിട്ടുള്ള തത്തുല്യ യോഗ്യതകളാണ് ആവശ്യപ്പെടുന്നത്.

അധ്യാപക തസ്തികകളിലേക്കുള്ള പ്രായപരിധി 22 മുതൽ 60 വയസ്സുവരെയാണ്. നിയമനം പൂർണമായും ഗസ്റ്റ് അടിസ്ഥാനത്തിലായിരിക്കും. മണിക്കൂറിന് 750 രൂപ നിരക്കിൽ പരമാവധി പ്രതിമാസം 22,500 രൂപയാണ് പ്രതിഫലം.

തിരഞ്ഞെടുപ്പിനായി നിശ്ചയിച്ചിട്ടുള്ള വെയിറ്റേജ് പ്രകാരം അടിസ്ഥാന യോഗ്യതയ്ക്ക് 75 ശതമാനവും അധിക യോഗ്യതകൾക്ക് 10 ശതമാനവും അഭിമുഖത്തിന് 15 ശതമാനവുമാണ് മാർക്ക്. പ്രവൃത്തിപരിചയത്തിനും പി.എച്ച്.ഡി യോഗ്യതയ്ക്കും അധിക മാർക്ക് ലഭിക്കും.

ഓൺലൈൻ അപേക്ഷ സമർപ്പണം ഒക്ടോബർ 30-ന് ആരംഭിച്ചു. നവംബർ 15 ആണ് അവസാന തീയതി. നവംബർ 20-ന് ചെക്ക്ലിസ്റ്റും നവംബർ 24-ന് (താൽക്കാലികം) അഭിമുഖത്തിനുള്ള പട്ടികയും പ്രസിദ്ധീകരിക്കും. നവംബർ 27 മുതൽ അഭിമുഖം നടത്താനാണ് നിലവിലെ സമയക്രമം.

ഓൺലൈൻ അപേക്ഷകൾ “https://serviceonline.gov.in” (https://serviceonline.gov.in) വഴി സമർപ്പിക്കണം. അഭിമുഖം ഓൺലൈനായോ നേരിട്ടോ നടത്തും. നേരിട്ടുള്ള അഭിമുഖത്തിന്റെ വേദി കവരത്തിയിലെ വിദ്യാഭ്യാസ ഡയറക്ടറേറ്റാണ്. അഭിമുഖത്തിൽ പങ്കെടുക്കുന്നവർക്ക് യാത്രാബത്തയോ മറ്റ് അലവൻസുകളോ അനുവദിക്കില്ല.

കൂടുതൽ വിവരങ്ങൾക്കും ഔദ്യോഗിക അറിയിപ്പുകൾക്കുമായി ലക്ഷദ്വീപ് ഭരണകൂടത്തിന്റെ “www.lakshadweep.gov.in” (https://www.lakshadweep.gov.in) വെബ്സൈറ്റ് സന്ദർശിക്കാം.