ദേശ് ബച്ചാവോ മോർച്ച യോഗത്തിൽ പങ്കെടുക്കാൻ ലക്ഷദ്വീപ് ഫിഷർമൻ അസോസിയേഷൻ പ്രതിനിധികളെ നിയോഗിച്ചു

കവരത്തി: സെപ്റ്റംബർ ഒന്നിന് ന്യൂഡൽഹിയിൽ നടക്കുന്ന ദേശ് ബച്ചാവോ മോർച്ചയുടെ ജനറൽ ബോഡി യോഗത്തിൽ പങ്കെടുക്കാൻ ലക്ഷദ്വീപ് ഫിഷർമൻ അസോസിയേഷൻ രണ്ട് പ്രതിനിധികളെ നിയോഗിച്ചു. അസോസിയേഷൻ പ്രസിഡന്റ് ഒപ്പുവെച്ച ആധികാരിക കത്ത് പ്രകാരമാണ് പ്രതിനിധികളെ ചുമതലപ്പെടുത്തിയത്.

മഹിളാ പ്രദേശ് അധ്യക്ഷയും ഭാരതീയ കിസാൻ യൂണിയൻ (ചാരുണി) നേതാവുമായ സുമൻ ഹൂഡ നൽകിയ ക്ഷണത്തിന്റെ അടിസ്ഥാനത്തിലാണ് യോഗത്തിൽ പങ്കെടുക്കാനുള്ള അസോസിയേഷന്റെ തീരുമാനം. സെപ്റ്റംബർ 1ന് രാവിലെ 10 മണിക്ക് ന്യൂഡൽഹിയിലെ ഗുരുദ്വാര റകാബ് ഗഞ്ച് സാഹിബ്, ഗുരു ഗോബിന്ദ് സിംഗ് ഭവൻ, പണ്ഡിറ്റ് പന്ത് മാർഗ് എന്നിവിടങ്ങളിലാണ് യോഗം നടക്കുന്നത്.

ലക്ഷദ്വീപ് ഫിഷർമൻ അസോസിയേഷനെ പ്രതിനിധീകരിച്ച് ഹുസുനുൽ ജംഹർ എം.പി., സലാഹുദ്ദീൻ പീച്ചിയത്ത് എന്നിവരെയാണ് യോഗത്തിൽ പങ്കെടുക്കാൻ അധികാരപ്പെടുത്തിയിരിക്കുന്നത്. ഹുസുനുൽ ജംഹർ അസോസിയേഷന്റെ ലീഗൽ അഡ്വൈസറും സാമൂഹിക പ്രവർത്തകനുമാണ്. സലാഹുദ്ദീൻ പീച്ചിയത്ത് ലക്ഷദ്വീപിൽ പ്രവർത്തിക്കുന്ന ഫ്രീലാൻസ് ജേണലിസ്റ്റും സാമൂഹിക പ്രവർത്തകനുമാണ്.

ദ്വീപുകളിലെ മത്സ്യത്തൊഴിലാളി സമൂഹം നേരിടുന്ന വിവിധ വിഷയങ്ങളിൽ ഇരുവർക്കും പരിചയമുണ്ടെന്നും യോഗത്തിൽ അസോസിയേഷനെ പ്രതിനിധീകരിക്കാൻ ഇരുവരെയും ഔദ്യോഗികമായി ചുമതലപ്പെടുത്തിയിട്ടുണ്ടെന്നും കത്തിൽ വ്യക്തമാക്കുന്നു.

ലക്ഷദ്വീപ് ഫിഷർമൻ അസോസിയേഷൻ SR553/2009 എന്ന രജിസ്ട്രേഷൻ നമ്പറിൽ കവരത്തി ആസ്ഥാനമായി പ്രവർത്തിക്കുന്ന സംഘടനയാണെന്നും കത്തിൽ വ്യക്തമാക്കിയിട്ടുണ്ട്. 2026 ഓഗസ്റ്റ് 26നാണ് പ്രതിനിധികളെ നിയോഗിച്ചുകൊണ്ടുള്ള കത്ത് പുറത്തിറക്കിയത്.