ടൗൺ ആൻഡ് കൺട്രി പ്ലാനിംഗ് ചട്ടങ്ങൾ പിൻവലിക്കണം; സമഗ്ര പുനഃപരിശോധന ആവശ്യപ്പെട്ട് ഹംദുള്ളാ സഈദ്

കവരത്തി: ലക്ഷദ്വീപ് ടൗൺ ആൻഡ് കൺട്രി പ്ലാനിംഗ് ആൻഡ് ഡെവലപ്മെന്റ് (പ്ലാനിംഗ് ആൻഡ് ഡെവലപ്മെന്റ് അതോറിറ്റി) റൂൾസ്, 2026-ന്റെ കരട് ചട്ടങ്ങൾ പിൻവലിച്ച് സമഗ്രമായി പുനഃപരിശോധിക്കണമെന്ന് ആവശ്യപ്പെട്ട് ലക്ഷദ്വീപ് പ്രദേശ് കോൺഗ്രസ് കമ്മിറ്റി പ്രസിഡന്റ് അഡ്വ. എം. ഹംദുള്ളാ സഈദ് എം.പി. കേന്ദ്ര നഗരവികസന മന്ത്രാലയത്തിലെ ബന്ധപ്പെട്ട അധികാരിയായ അവിനാശ് സിങ് ഉൾപ്പെടെയുള്ളവരുടെ ശ്രദ്ധയിൽ വിഷയം കൊണ്ടുവന്ന് വിശദമായ എതിർപ്പുകൾ സമർപ്പിച്ചു.

2026 ഒക്ടോബർ 15-ന് നൽകിയ കത്തിൽ, കരട് ചട്ടങ്ങൾ ലക്ഷദ്വീപിലെ തദ്ദേശീയ ജനങ്ങളുടെ ഭൂമിയവകാശം, വീടുകളുടെ സുരക്ഷ, പരമ്പരാഗത ഉപജീവനമാർഗങ്ങൾ, ജനാധിപത്യപരമായ പങ്കാളിത്തം എന്നിവയെ പ്രതികൂലമായി ബാധിക്കുമെന്ന ആശങ്കയാണ് കോൺഗ്രസ് ഉന്നയിക്കുന്നത്. 2026 സെപ്റ്റംബർ 18-ന് വിജ്ഞാപനം ചെയ്ത മൂന്ന് കരട് ചട്ടങ്ങളുമായി ബന്ധപ്പെട്ടാണ് എതിർപ്പുകൾ സമർപ്പിച്ചിരിക്കുന്നത്.

ലക്ഷദ്വീപ് ഭൂപ്രകൃതി, സാമൂഹിക-സാംസ്കാരിക സാഹചര്യം, പരിസ്ഥിതി എന്നിവയിൽ മുഖ്യഭൂഖണ്ഡത്തിലെ നഗരങ്ങളിൽനിന്ന് വ്യത്യസ്തമാണെന്നും പരിമിതമായ ഭൂമിയും ദുർബലമായ പരിസ്ഥിതിവ്യവസ്ഥയും കണക്കിലെടുത്ത് പ്രത്യേക പരിഗണനയോടെയായിരിക്കണം വികസന ചട്ടങ്ങൾ രൂപീകരിക്കേണ്ടതെന്നും കത്തിൽ ചൂണ്ടിക്കാട്ടുന്നു.

അധികാര കേന്ദ്രീകരണത്തിനെതിരെ വിമർശനം

പ്ലാനിംഗ് ആൻഡ് ഡെവലപ്മെന്റ് അതോറിറ്റിക്കും ഭരണകൂടത്തിനും ഭൂവിനിയോഗം, വികസനാനുമതി, നിയമനടപടികൾ, ഭൂമി ഏറ്റെടുക്കൽ, ഒഴിപ്പിക്കൽ തുടങ്ങിയ വിഷയങ്ങളിൽ വിപുലമായ അധികാരങ്ങൾ നൽകുന്നത് ആശങ്കാജനകമാണെന്ന് കോൺഗ്രസ് പറയുന്നു. ഇത്തരം തീരുമാനങ്ങളിൽ ജനപ്രതിനിധികൾക്കും തദ്ദേശസ്ഥാപനങ്ങൾക്കും ഭൂവുടമകൾക്കും പ്രദേശവാസികൾക്കും അർഥവത്തായ പങ്കാളിത്തം ഉറപ്പാക്കണമെന്നും പൊതുജനാഭിപ്രായം തേടുന്നതിനും എതിർപ്പുകൾ പരിഗണിക്കുന്നതിനും സുതാര്യമായ നടപടിക്രമങ്ങൾ വേണമെന്നും ആവശ്യപ്പെട്ടു.

പൂർവിക ഭൂമിയുടെയും വീടുകളുടെയും സംരക്ഷണം

തലമുറകളായി കൈവശംവെച്ചുവരുന്ന ഭൂമിയുടെ ഉടമസ്ഥാവകാശവും താമസാവകാശവും സംരക്ഷിക്കുന്നതിന് വ്യക്തമായ വ്യവസ്ഥകൾ വേണമെന്ന് കത്തിൽ ആവശ്യപ്പെടുന്നു. സാധാരണ വീടുകളുടെ നിർമാണം, അറ്റകുറ്റപ്പണി, നവീകരണം തുടങ്ങിയവയ്ക്ക് സങ്കീർണമായ അനുമതി നടപടികൾ ഏർപ്പെടുത്തുന്നത് കുടുംബങ്ങൾക്ക് ബുദ്ധിമുട്ടുണ്ടാക്കുമെന്ന് ചൂണ്ടിക്കാട്ടി, ഇത്തരം പ്രവൃത്തികൾക്ക് ലളിതവും ചെലവുകുറഞ്ഞതും സമയബന്ധിതവുമായ അനുമതി സംവിധാനം വേണമെന്നും ആവശ്യപ്പെട്ടു.

നിർമാണ സാമഗ്രികളും തൊഴിലാളികളും ദ്വീപുകളിലേക്ക് എത്തിക്കുന്നതിനുള്ള ഉയർന്ന ചെലവിനൊപ്പം അധിക ഫീസുകളും വികസനച്ചാർജുകളും ഏർപ്പെടുത്തുന്നത് സാധാരണ കുടുംബങ്ങൾക്ക് സാമ്പത്തികഭാരമാകുമെന്നും കോൺഗ്രസ് ചൂണ്ടിക്കാട്ടുന്നു. സാമ്പത്തികമായി പിന്നാക്കം നിൽക്കുന്നവർക്കും സാധാരണ താമസാവശ്യങ്ങൾക്കുമായി ഇളവുകൾ നൽകണമെന്നും കത്തിൽ ആവശ്യപ്പെടുന്നു.

ഭൂമി ഏറ്റെടുക്കലിലും ഒഴിപ്പിക്കലിലും നിയമസംരക്ഷണം വേണം

പൊതുതാൽപര്യത്തിന്റെ പേരിൽ ഭൂമി ഏറ്റെടുക്കുന്നതിനും കൈവശക്കാരെ ഒഴിപ്പിക്കുന്നതിനുമുള്ള വ്യവസ്ഥകൾ പുനഃപരിശോധിക്കണമെന്നാണ് മറ്റൊരു ആവശ്യം. നിയമപരമായ നടപടിക്രമങ്ങൾ, മതിയായ അറിയിപ്പ്, നഷ്ടപരിഹാരം, പുനരധിവാസം, അപ്പീൽ നൽകാനുള്ള അവസരം എന്നിവ ഉറപ്പാക്കാതെ കുടുംബങ്ങളുടെ താമസസുരക്ഷയെ ബാധിക്കുന്ന നടപടികൾ ഉണ്ടാകരുതെന്ന് കത്തിൽ പറയുന്നു.

ഒഴിപ്പിക്കൽ നടപടികളിൽ ബലപ്രയോഗത്തിനുള്ള അധികാരങ്ങൾ വ്യക്തമായി നിർവചിക്കണമെന്നും ഏകപക്ഷീയമോ ആനുപാതികമല്ലാത്തതോ ആയ നടപടികൾ തടയുന്നതിനുള്ള സംവിധാനങ്ങൾ വേണമെന്നും കോൺഗ്രസ് ആവശ്യപ്പെട്ടു.

പരിസ്ഥിതിയും പരമ്പരാഗത തൊഴിലുകളും പരിഗണിക്കണം

ചെറുതും താഴ്ന്നതുമായ ദ്വീപുകൾ, തീരദേശ പരിസ്ഥിതി, ലഗൂണുകൾ, ഭൂമിയുടെ പരിമിതി എന്നിവ കണക്കിലെടുത്ത് ഓരോ ദ്വീപിനും അനുയോജ്യമായ വികസന മാനദണ്ഡങ്ങൾ രൂപീകരിക്കണമെന്ന് കത്തിൽ നിർദേശിക്കുന്നു. പരിസ്ഥിതി സംരക്ഷണത്തോടൊപ്പം മത്സ്യബന്ധനം, തെങ്ങുകൃഷി, ചെറുകിട വ്യാപാരം തുടങ്ങിയ പരമ്പരാഗത ഉപജീവനമാർഗങ്ങളെയും സമൂഹത്തിന്റെ പതിവ് താമസരീതികളെയും ബാധിക്കാത്ത രീതിയിലായിരിക്കണം ആസൂത്രണ നടപടികളെന്നും ചൂണ്ടിക്കാട്ടുന്നു.

ജനങ്ങളുടെ അവകാശങ്ങളും ദ്വീപുകളുടെ സവിശേഷതകളും സംരക്ഷിക്കുന്നതിനായി പ്രാദേശിക സാഹചര്യങ്ങൾ അടിസ്ഥാനമാക്കിയുള്ള പഠനങ്ങളും ജനങ്ങളുമായി കൂടിയാലോചനകളും അനിവാര്യമാണെന്നും കോൺഗ്രസ് നിലപാടറിയിച്ചു.

കരട് ചട്ടങ്ങൾക്കെതിരെ ഇന്ത്യൻ നാഷണൽ കോൺഗ്രസ് ലക്ഷദ്വീപ് നേരത്തേ സമർപ്പിച്ച എതിർപ്പുകൾ നിലനിൽക്കുമെന്നും പുതിയ നിവേദനം അവ പിൻവലിച്ചതായി കണക്കാക്കരുതെന്നും കത്തിൽ വ്യക്തമാക്കിയിട്ടുണ്ട്. ജനങ്ങളുടെ നിയമപരമായ അവകാശങ്ങളെ ബാധിക്കുന്ന വ്യവസ്ഥകൾക്കെതിരെ ബന്ധപ്പെട്ട കോടതികളെയും നിയമപരമായ വേദികളെയും സമീപിക്കാനുള്ള അവകാശവും കോൺഗ്രസ് സംവരണം ചെയ്തിട്ടുണ്ട്.