ഭരണകൂടത്തിനെതിരെ മൗനം, രാഷ്ട്രീയ വിവാദത്തിൽ ശബ്ദം; അലി അക്ബറിനെതിരെ വിമർശനം

കവരത്തി: മിസറാവ് ചാനലിൽ സംഘടിപ്പിച്ച സർവകക്ഷി യോഗവുമായി ബന്ധപ്പെട്ട വിവാദത്തിൽ ചാനൽ പ്രതിനിധി സലാഹുദ്ദീന് മറുപടിയുമായി ലക്ഷദ്വീപ് യൂത്ത് കോൺഗ്രസ് മുൻ പ്രസിഡന്റ് അലി അക്ബർ വീണ്ടും രംഗത്തെത്തി. സർവകക്ഷി യോഗത്തിന്റെ പാനലിൽ എൻ.സി.പി അംഗങ്ങളെ ഉൾപ്പെടുത്തി പാർട്ടിയുടെ രാഷ്ട്രീയ അജണ്ട നടപ്പാക്കാനും കോൺഗ്രസ് വിരുദ്ധ രാഷ്ട്രീയം പ്രചരിപ്പിക്കാനുമാണ് മിസറാവ് ശ്രമിക്കുന്നതെന്ന് അലി അക്ബർ ആരോപിച്ചു. നേരത്തെ മെഹദാ ഹുസൈന്റെ വീഡിയോയ്ക്ക് പ്രതികരണവുമായും അലി അക്ബർ രംഗത്ത് വന്നിരുന്നു. മിസറാവ് സ്വതന്ത്ര മാധ്യമമല്ലെന്നും എൻ.സി.പിയുടെ രാഷ്ട്രീയ താൽപ്പര്യങ്ങൾക്കായി പ്രവർത്തിക്കുകയാണെന്നും അദ്ദേഹം വിമർശിച്ചു.

എന്നാൽ, ഹംദുള്ള സൈദിനെതിരെ മിസറാവ് ചാനൽ ആരോപണങ്ങൾ ഉന്നയിച്ചപ്പോൾ അതിനെതിരെ പ്രതികരിക്കാൻ അലി അക്ബർ മുന്നോട്ടുവന്നത് ദ്വീപിലെ രാഷ്ട്രീയ വൃത്തങ്ങളിൽ ചർച്ചയായിരിക്കുകയാണ്. ലക്ഷദ്വീപ് ഭരണകൂടത്തിന്റെയും അഡ്മിനിസ്ട്രേഷന്റെയും ഭാഗത്തുനിന്ന് ജനങ്ങൾ കടുത്ത നടപടികളും നിയന്ത്രണങ്ങളും നേരിട്ട വിവിധ ഘട്ടങ്ങളിൽ ഒരുവാക്കുകൊണ്ടുപോലും പ്രതികരിക്കാൻ തയ്യാറാകാതിരുന്ന അലി അക്ബർ, ഇപ്പോൾ ഹംദുള്ള സൈദിനെതിരായ ആരോപണത്തിൽ പ്രതികരണവുമായി രംഗത്തെത്തിയതിലെ വൈരുധ്യമാണ് വിമർശകർ ചൂണ്ടിക്കാട്ടുന്നത്.

ദ്വീപ് ജനതയുടെ ജീവിതത്തെയും അവകാശങ്ങളെയും ബാധിക്കുന്ന നിരവധി ഭരണകൂട നടപടികൾ ഉണ്ടായപ്പോഴും മൗനം പാലിച്ചുവെന്ന വിമർശനം നേരിടുന്ന അലി അക്ബറിന്റെ ഇപ്പോഴത്തെ ഇടപെടൽ, അദ്ദേഹത്തിന്റെ രാഷ്ട്രീയ മുൻഗണനകളെക്കുറിച്ചുള്ള ചോദ്യങ്ങൾക്കും വഴിവെച്ചിട്ടുണ്ട്. ജനങ്ങൾ വലിയ പ്രതിസന്ധികൾ നേരിട്ട സമയങ്ങളിൽ പ്രതികരിക്കാതിരുന്ന നേതാവ്, രാഷ്ട്രീയ വിവാദങ്ങളിൽ മാത്രം സജീവമായി രംഗത്തെത്തുന്നത് എന്തുകൊണ്ടാണെന്ന ചോദ്യമാണ് ഒരു വിഭാഗം കോൺഗ്രസ് പ്രവർത്തകരും ഉയർത്തുന്നത്.

എൻ.എസ്.യു.ഐയിലൂടെയും യൂത്ത് കോൺഗ്രസിലൂടെയും രാഷ്ട്രീയരംഗത്ത് വളർന്നുവന്ന അലി അക്ബറിൽ കോൺഗ്രസ് പ്രവർത്തകർക്ക് വലിയ പ്രതീക്ഷകളുണ്ടായിരുന്നു. എന്നാൽ, ദ്വീപ് ജനത ഭരണകൂട നടപടികൾക്കെതിരെ ആശങ്കകൾ ഉന്നയിച്ച ഘട്ടങ്ങളിൽ നേതൃത്വപരമായ ഇടപെടൽ ഉണ്ടായില്ലെന്ന വിമർശനം അദ്ദേഹത്തിനെതിരായ അതൃപ്തിക്ക് ആക്കം കൂട്ടിയിട്ടുണ്ട്. ഹംദുള്ള സൈദിനെതിരായ ആരോപണത്തിൽ പ്രതികരിക്കാൻ അലി അക്ബർ കാണിച്ച താൽപ്പര്യം, ജനങ്ങളെ ബാധിച്ച ഭരണകൂട നടപടികളുടെ കാലത്ത് എവിടെയായിരുന്നുവെന്ന ചോദ്യമാണ് ഇപ്പോൾ ഉയരുന്നത്. മിസറാവിന്റെ രാഷ്ട്രീയ നിലപാടുകളെക്കുറിച്ചുള്ള വിവാദത്തിനൊപ്പം, പൊതുപ്രശ്നങ്ങളിൽ രാഷ്ട്രീയ നേതാക്കൾ പുലർത്തേണ്ട ഉത്തരവാദിത്വവും അവരുടെ പ്രതികരണങ്ങളിലെ സ്ഥിരതയും വീണ്ടും ചർച്ചയാകുകയാണ്.