ഭരണകൂടം റാലിക്ക് അനുമതി നിഷേധിച്ചു: ലക്ഷദ്വീപിൽ ഗ്രാമസഭ ബഹിഷ്കരിച്ച് സി.ജെ.പി.യുടെ ബ്ലാക്ക് റിബൺ പ്രോട്ടസ്റ്റ്

കവരത്തി: ലക്ഷദ്വീപിലെ വിവിധ ദ്വീപുകളിൽ സി.ജെ.പി. (CJP) സംഘടിപ്പിക്കാനിരുന്ന സമാധാനപരമായ റാലികൾക്ക് ദ്വീപ് ഭരണകൂടം അനുമതി നിഷേധിച്ചു. അധികാരികളുടെ ഈ നടപടിയിൽ പ്രതിഷേധിച്ച് സി.ജെ.പി. ലക്ഷദ്വീപ് ഘടകത്തിന്റെ നേതൃത്വത്തിൽ ഗ്രാമസഭകൾ ബഹിഷ്കരിക്കുകയും കറുത്ത റിബൺ ധരിച്ച് വ്യത്യസ്ത രീതിയിലുള്ള പ്രതിഷേധ പരിപാടികൾ സംഘടിപ്പിക്കുകയും ചെയ്തു.
മുംബൈയിൽ നടക്കുന്ന സി.ജെ.പി.യുടെ സമരത്തിന് ഐക്യദാർഢ്യം പ്രഖ്യാപിച്ചുകൊണ്ടും ‘സേവ് ലക്ഷദ്വീപ് 02’ (Save Lakshadweep 02) എന്ന ആഹ്വാനമുയർത്തിയുമാണ് ദ്വീപുകളിൽ പ്രതിഷേധ പരിപാടികൾ പ്രഖ്യാപിച്ചിരുന്നത്. എല്ലാവിധ വിഭാഗീയതകളും മറന്ന് ലക്ഷദ്വീപ് ജനത ഒന്നാകണമെന്ന് ആഹ്വാനം ചെയ്തുകൊണ്ട് ബൈക്ക് റാലിയും മനുഷ്യച്ചങ്ങലയുമായിരുന്നു സി.ജെ.പി. സംഘടിപ്പിക്കാൻ തീരുമാനിച്ചിരുന്നത്.
എന്നാൽ അനുമതി നിഷേധിച്ചതിലൂടെ ജനങ്ങളുടെ സംസാരിക്കാനുള്ള അവകാശത്തെയാണ് അധികാരികൾ ഹനിക്കുന്നതെന്ന് സി.ജെ.പി. ഭാരവാഹികൾ ആരോപിച്ചു. ദ്വീപ് അഡ്മിനിസ്ട്രേഷൻ സി.ജെ.പി.യെ ഭയന്നു തുടങ്ങിയെന്നതിന്റെ വ്യക്തമായ തെളിവാണിതെന്നും അവർ കൂട്ടിച്ചേർത്തു.
അനുമതി നിഷേധിച്ചതിനെ തുടർന്ന് വായിൽ കറുത്ത റിബൺ കെട്ടിയാണ് പ്രവർത്തകർ ഗ്രാമസഭകൾ ബഹിഷ്കരിച്ചത്. തുടർന്ന് മുൻ നിശ്ചയിച്ച പ്രകാരം ബൈക്ക് റാലി അടക്കമുള്ള സമരപരിപാടികൾ സംഘടിപ്പിച്ചു. വരും ദിവസങ്ങളിൽ ഇതിലും ശക്തമായ സമരങ്ങളുമായി മുന്നോട്ടുപോകുമെന്നും വിഭാഗീയതകൾ മറന്ന് എല്ലാവരും സി.ജെ.പി.യോടൊപ്പം അണിനിരക്കണമെന്നും ഭാരവാഹികൾ അഭ്യർത്ഥിച്ചു.