ഗുരുപുര ജലപാതയ്ക്കും ലക്ഷദ്വീപ് ജെട്ടി പദ്ധതിക്കും പരിസ്ഥിതി-CRZ അനുമതി

മംഗളൂരു: കർണാടക മാരിടൈം ബോർഡ് ഗുരുപുരയിൽ നിർദ്ദേശിച്ച ജലപാത വികസന പദ്ധതിക്കും പഴയ മംഗളൂരു തുറമുഖത്ത് ലക്ഷദ്വീപിനായി പ്രത്യേകം നിർമ്മിക്കുന്ന ജെട്ടി പദ്ധതിക്കും ആവശ്യമായ പരിസ്ഥിതി, തീരദേശ നിയന്ത്രണ മേഖല (CRZ) അനുമതികൾ ലഭിച്ചു. ഉഡുപ്പി പോർട്ട്സ് ആൻഡ് ഫിഷറീസ് എക്സിക്യൂട്ടീവ് എഞ്ചിനീയറാണ് വാർത്താക്കുറിപ്പിലൂടെ ഇക്കാര്യം അറിയിച്ചത്.

കാർഗോ കൈകാര്യം ചെയ്യുന്നതിനുള്ള സൗകര്യങ്ങളും ക്രൂയിസ് ടെർമിനലും വികസിപ്പിക്കുന്നത് ഉൾപ്പെടുന്നതാണ് ഈ പദ്ധതികൾ. കർണാടക സ്റ്റേറ്റ് എൻവയോൺമെൻ്റ് ഇംപാക്ട് അസസ്മെൻ്റ് അതോറിറ്റിയാണ് (SEIAA) പദ്ധതിക്ക് പച്ചക്കൊടി കാണിച്ചത്.

ദക്ഷിണ കന്നഡ ഡെപ്യൂട്ടി കമ്മീഷണറുടെ നേതൃത്വത്തിൽ പദ്ധതികൾക്കായി പരിസ്ഥിതി പൊതുതെളിവെടുപ്പ് നടത്തിയിരുന്നു. തുടർന്ന് SEIAA, കർണാടക പരിസ്ഥിതി വകുപ്പ്, സി.ആർ.ഇസഡ് (CRZ) അധികൃതർ എന്നിവരിൽ നിന്ന് അന്തിമ അംഗീകാരം ലഭിക്കുകയായിരുന്നു.

പരിസ്ഥിതി, CRZ അനുമതികളുടെ പകർപ്പുകൾ കർണാടക സംസ്ഥാന മലിനീകരണ നിയന്ത്രണ ബോർഡിലും കേന്ദ്ര പരിസ്ഥിതി മന്ത്രാലയത്തിന്റെ പോർട്ടലിലും (parivesh.nic.in) കർണാടക മാരിടൈം ബോർഡിന്റെ വെബ്‌സൈറ്റിലും ലഭ്യമാണ്.