കോഴിക്കോട്: ആർമി, റബ്ബർ ബോർഡ് റിട്ട. ഉദ്യോഗസ്ഥനും പ്രമുഖ ജീവകാരുണ്യ പ്രവർത്തകനുമായ പി.പി. ഹംസയെ കക്കോടി മേഖല ശിഹാബ് തങ്ങൾ ശ്രേഷ്ഠ പുരസ്കാരം നൽകി ആദരിക്കുന്നു. ലക്ഷദ്വീപിനെ മലനാട്ട് പരിപാടിയുടെ ഭാഗമായി ഡിസംബർ 30-ന് കോഴിക്കോട് ടൗൺ ഹാളിൽ നടക്കുന്ന മലനാട്ട് 15-ാം വാർഷികാഘോഷ ചടങ്ങിലാണ് പുരസ്കാര സമർപ്പണം.
അനാഥരും അഗതികളും രോഗികളും അടക്കമുള്ള ദുരിതബാധിതർക്കായി തന്റെ വരുമാനത്തിന്റെ ഒരു ഭാഗം മാറ്റിവെച്ച്, സ്വന്തം കൈവശമുള്ള വിഭവങ്ങൾ വിനിയോഗിച്ച് തുടർച്ചയായി ജീവകാരുണ്യ പ്രവർത്തനങ്ങൾ നടത്തുന്ന വ്യക്തിയാണ് പി.പി. ഹംസ. ലക്ഷദ്വീപിലായാലും നാട്ടിലായാലും പ്രയാസപ്പെടുന്നവരുടെ കൂടെ നിന്നുകൊണ്ട് സഹായഹസ്തം നീട്ടുന്ന അദ്ദേഹത്തിന്റെ സേവനങ്ങളെ മുൻനിർത്തിയാണ് പുരസ്കാരം നൽകുന്നത്.
കക്കോടി മേഖല ശിഹാബ് തങ്ങൾ റിലീഫ് കമ്മിറ്റിയുടെ മാർഗദർശികൂടിയായ പി.പി. ഹംസയുടെ സാമൂഹ്യ സേവന പ്രവർത്തനങ്ങൾ പൊതുസമൂഹത്തിൽ വലിയ അംഗീകാരം നേടിയിട്ടുണ്ട്. അദ്ദേഹത്തിന് ലഭിക്കുന്ന ഈ പുരസ്കാരം ജീവകാരുണ്യ പ്രവർത്തനങ്ങൾക്കുള്ള അർഹമായ അംഗീകാരമാണെന്ന് സംഘാടകർ അറിയിച്ചു.
