നെടുങ്കണ്ടം: നെടുങ്കണ്ടം പോസ്റ്റോഫീസിൽ എത്തേണ്ട പാഴ്‌സലുകളും സ്പീഡ് പോസ്റ്റ് ഉരുപ്പടികളും പിൻകോഡ് തെറ്റി ലക്ഷദ്വീപിലേക്ക് പോകുന്നത് ഉപഭോക്താക്കളെ വലയ്ക്കുന്നു. പിൻകോഡിലെ അക്കങ്ങളുടെ സാമ്യമാണ് ഈ പ്രശ്നത്തിന് കാരണം.
ഇത് കൊണ്ടാണ് ഗുജറാത്തിൽ നിന്ന് നെടുങ്കണ്ടത്തെ ഒരു വ്യാപാരിക്ക് അയച്ച തപാൽ ഉരുപ്പടി ഒരുമാസത്തിന് ശേഷമേ ലഭിക്കാൻ കഴിഞ്ഞുള്ളൂ. നെടുങ്കണ്ടം സബ് പോസ്റ്റോഫീസിന്റെ പിൻകോഡ് 685553 ആയതിനാൽ, ലക്ഷദ്വീപിലെ അഗത്തി ദ്വീപിന്റെ പിൻകോഡ് 682553 എന്നതുമായി ഒരക്കം മാത്രം വ്യത്യാസമുള്ളതാണ് ആശയക്കുഴപ്പം സൃഷ്ടിക്കുന്നത്.
കൊച്ചി തപാൽ സോർട്ടിങ് ഹബ്ബിൽ ജീവനക്കാർ ഈ സാമ്യം തിരിച്ചറിയാതെ 553 എന്ന അവസാനത്തെ അക്കങ്ങൾ മാത്രം ശ്രദ്ധിച്ച് പാഴ്‌സലുകൾ ലക്ഷദ്വീപിലേക്ക് അയക്കുന്ന സംഭവങ്ങളാണ് ആവർത്തിക്കുന്നത്. ഇവ ലക്ഷദ്വീപിലെത്തിയശേഷം മാത്രമേ തെറ്റിദ്ധാരണകൾ തിരുത്താൻ കഴിയുന്നുള്ളൂ.
അതിന്റെ ആഘാതമായി, അടിയന്തരമായി എത്തേണ്ട മരുന്നുകൾ, പാസ്പോർട്ട്, സർട്ടിഫിക്കറ്റുകൾ തുടങ്ങിയവ ആഴ്ചകളിലേറെ വൈകിയാണ് ലഭിക്കുന്നത്. ഈ പ്രശ്നം ചൂണ്ടിക്കാട്ടി നെടുങ്കണ്ടത്തെ ഒരു വ്യാപാരി പോസ്റ്റൽ വകുപ്പിന് പരാതി നൽകിയിരുന്നു. അതിന് മറുപടിയായി പ്രശ്നം ശ്രദ്ധയിൽപെട്ടിട്ടുണ്ടെന്നും ഉടൻ പരിഹരിക്കുമെന്നും വകുപ്പിന്റെ ഉറപ്പു ലഭിച്ചതായി വ്യാപാരി അറിയിച്ചു.
നെടുങ്കണ്ടത്തിലേക്ക് കത്തയച്ചാല്‍ അഗത്തിയിൽ കിട്ടും; വട്ടംകറക്കി പിന്‍കോഡിലെ സാമ്യം
